انت اللي بتختار كل حاجة
سعادتك ,, حزنك ,, شقاءك ,, تعاستك
وانا بصراحة قاصده اني احط المشاعر الوحشة اكتر من الحلوة
حد حيسألني ليه ؟!
اقوله لان معظم الناس دلوقتي بقت ماشية بتبص عالسلبيات بس ,, وناسية خالص الإيجابيات
وتيجي تكلمه يقولك والله انا باصص بس السلبيات بتعميني ,,
وفي اللي يقولك ايجابيات ايه بس في العالم اللي انا عايش فيه ده !!
معلش استوب كده يا معلم o_O
بالنسبة للإيجابيات ,, في حاجات ايجابية كتيرة اوي موجودة انت بس مش باصص عليها , او مش لاقي اللي يخليك تشوفها.
انا حعمل معاك اتفاق ,, جيب شريطة سودة وحطها علي عينيك ,, وجرب تقضي يوم كامل وانت حاططها علي عينيك ,,
اول حاجة : مش حتلاقي باب تخرج منه عشان تطلع بره اوضتك , تاني حاجة حتروح تغسل وشك احتمال تدخل الصالون بدل الحمام ,, وانت ماشي في الشقة حتخبط في اللي رايح واللي جاي ,, ولا مفر من الحيطان طبعا :) وخد عندك بقي , متعرفش تاكل ولا تشرب و تخش اوض غلط وممكن تدخل علي باباك التويلت وهو بيستحمي وفي الاخر حيقولوا عليك مجنون .
كل ده حصل عشان بس غميت عينيك ,,
طب ما انت عندك يا ابن الناس عينين اهو ! ,, قول الحمد لله واستغلهم صح ,, متقعدش تبص علي اللي رايحة واللي جاية وتتفرج علي حاجات ملهاش لزمة وتقول انا ليه حياتي عاملة كده ,, حياتك عاملة كده عشان النعم اللي ربنا مديهالك انت مش مستغلها صح .
جرب يوم متتكلمش فيه خالص ,, عاوزاك تحس باحساس اللي مش بيتكلم ده ,, وازاي معاناته بتوصل إلي انه يشاور عشان مش قادر يوصل للي ادامه اللي هو عاوزه ,,
انت حابب تكون كده ؟؟ معتقدش !
طيب دلوقتي انت بتسمع وبتشوف وبتتكلم وبتشم وبتمشي وبتتنط وبتعمل كل الحاجات دي ,, ومتضايق !!
حد حيقولي الحاجات دي بردو مش كل حاجة ,,
حقوله عندك حق ,, بس بردو مشكلتك في الدنيا مش حتبقي اكبر من مشكلة فقدان البصر او عدم النطق او انك تكون مش قادر تمشي ولا تجري ,,
الدنيا قصيرة مفيهاش حاجة لما تعيش حياتك شوية ,,
اتجنن : ارقص واتصور مع صحابك في الشارع ,, وزع بلونات علي الناس ,, وقف ناس واتصور معاهم وانت متعرفهومش ,, طلع ورقة وقلم واكتب اي شعر حلمنتيشي ,, امسك كراسة رسم واقعد شخبط وارسم اي هبل وخلاص ,, اعمل بيدج عالفيس باسم الفنان + " أسمك " ونزل فيها اللي رسمته ده ,,(( بس لو الناس شتمت انا مليش دعوه هاه !! :) :) ))
ربك اللي انجد موسي من فرعون , ويونس من الغرق , والمسيح من التعذيب , ويوسف من العبودية .. مش حيعرف يطلعك من المشكلة اللي انت فيها !!
شفت بقي انت بإيدك سعادتك إزاي !!
حتي ولو كان اد ايه حجم المشاكل اللي واجهتها,,
امسكها وحلها ,,
وطلع للدنيا لسانك وقولها ,,
بردو حفضل فرحان و حتنطط وازقطط ,,
وحقول طز للدنيا كلها ,,
0 التعليقات:
Post a Comment