الدليل العصري لزواج مصري ناجح

عزيزي العريس المصري , عزيزتي العروسة المصرية ,,

  Khaltabita Masria تقدم لكم اليوم وحصريا دليل العريس والعروسة لعمل فرح مصري ناجح :.

عزيزتي العروسة :.

============

لكي تنعمي بزفاف راقي و لائق يجب عليكي اتباع الآتي :.

* من المهم ان تذهلي زوجك بكونك امريكانية الاصل وهذا بتلوين شعرك جميع الدرجات من البني إلي الاصفر , او ممكن كإختصار تقولي لمكوجي الرجل اللي بتروحيله يوم الفرح انك عاوزة قصة شعر عالموضة وصدقيني دي مش بتختلف من سنة للتانية لا هي دي الموضة بتاعة كل سنة وكل فرح .

* يجب عليكي ابراز عينيكي ,, وحتة ابراز دي مهمة ,, يعني لازم الســــــــــــــحبة بتاعة العين اللي علي فوق دي ! ويا سلام بقي لو انتي عينك واسعة فتبقي مبرقة كده والعريس يخاف منك !!

* لو انتي مش محجبة يبقي لازم حتلجأي للبودرة علي جسمك كله , ايوه تبقي ماشية بتسقطي بودرة كده ! لا ويكأن البت البياض بيشوووووووور منها !!

* فكرة ان شعرك كله يبقي متداري دي فكرة فكسانة موت , لا يا حبيبتي لازم تطلعي علي الاقل 3/4 شعرك بره عشان المعازيم كلهم يعرفوا انك مصروف عليكي

* اهم خطوة تكمن في الفستان ,, طبعا لازم يكون بتطريــــــــــــــــــز لا والتطريز بقي من اللي قلبك يحبه , والاهم بقي من ده " الطوق "

ودائما ما يلاحق كلمة " طوق " كلمات عديدة بمعاني كثيرة , الطوق ده بيخلي البنت في الفرح كانها حامل في عيل , يعني هي لا عارفة ترقص ولا تركز مع جوزها لانها بتعدل الفستان , وكمان بقي شوف وهي ماشية لازم تمسكه , فهي المفروض عليها انها تمسك في ايد جوزها و تمسك البوكية وتمسك الطوق عشان متتكعبلش في الفستان وفي نفس ذات الوقت سبحان الله بقدرة قادر المفروض انها ترقص وتهيص

مهو اصل الواحدة لازم تعمل العجب في اليوم ده , هو يختي اليوم ده بييجي في العمر مرتين !؟!

عزيزي العتريــ . . أحم , قصدي العريس :.

========================

* طبعا قبل الفرح بساعات قليلة بتبقي عامل زي كفار الجاهلية , دقنك طويل وشعرك طويل وحالتك حالة ,, لا لازم تروح للحلاق تخليه يعملك قصة رجل الديك, او ممكن بردو القصة الشهيرة ,, ينزلك قُصة علي أدام كده ويلزقها !! بتدي شكل لطيف اوي :)

* لازم كعريس طبعا تقلع الجاكيت في الفرح وجمهورية مصر العربية كلها تعرف انك عرقان ,, ودي مش المفروض انها حاجة تضايقك خالص !! بل بالعكس , انت كده بتحافظ علي التراث العربي من الضياع .

أعزائي اللي بيدوروا علي قاعة :.

==================

* من الضروري ان تكون القاعة بها عدة فقرات مثل :.

- شو الشربات : اللي هو الشو اللي بتقعدوا تشربوا بعض فيه ادام الكاميرا ويكأنكم آخر مرة تشربوا شربات فيها فلازم تأرخوا الحدث الفظيع ده .

- شو التورتة : اللي هو بتأكلوا بعض فيه و يمتاز بنفس الرخص بتاع شو الشربات , وفي بعض الاحيان العريس والعروسة بيبقوا ظراف فيبتدوا يلغوصوا بعض بالتورتة مع بصة من العريس للعروسة بمعني " ده انا حنفخك عالحركة دي ! " .

- الرقصة السلو : طبعا لازم الفقرة دي تتكرر 18 مرة في الفرح الواحد , لازم اول مرة علي اغنية واحد اللي بيغني , والتانية واحدة اللي بتغني , والتالتة ميكس عربي , والرابعة علي اغنية اجنبية .

* القاعة ياريت بتكون مفيهاش اوبن بوفيه , طبعا عشان دي كلها كماليات يمكن الاستغناء عنها , وعشان منفتحش في مواضيع احنا في غني عنها .

* طبعا فوتوجرافر القاعة لازم يعمل الشو اللطيف بتاعة ويصور العروسة وهي حاطة ايديها تحت دقنها ووهم حاضنين بعض و الرموش في الرموش واول البؤ علي اول البؤ والجو الحمضان ده , لا وتلاقي الناس بيتباهوا اوي بصور القاعة !!

* طبعا الدي جي لازم يكون شعبي عشان يبقي حافظ المهرجانات اللي بتتذاع دي , ايوه اللي هي المعازيم بيتحولوا فيها لعوم الترع ده !

وها قد وصلنا لآخر فقرتنا اليوم بعنوان " الدليل العصري لزواج مصري ناجح " , ونتمني لكل زوج مقبل علي الزواج السعادة بشعرهم و بلزقهم و عرقهم ,, ولا إله إلا الله وحســــــبي الله ونعم الوكيل . . .

Photo By : Mohamed Elfar Photography

Penulis : Unknown ~ Sebuah blog yang menyediakan berbagai macam informasi

Artikel الدليل العصري لزواج مصري ناجح ini dipublish oleh Unknown pada hari January 28, 2014. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 0 komentar: di postingan الدليل العصري لزواج مصري ناجح