كبنات مصر يعني

مساء الخير ( او صباح الخير , علي حسب الوقت عندك بقي! ) ,, انا بكتب الموضوع ده عشان اوضح حاجة صغيرة جداا , ألا وهي " الانفصام في الشخصية اللي عند الشباب " _ وخصوصا في مصر _ !

اه والله زمبؤلك كده ! انفصام في الشخصية حقيقي يعني مش هزار ,, مش مصدقني !! طيب انا حديك دليل قاطع , وحعمل معاك رهان كمان , لو كلامي طلع غلط انا مستعدة اديك 100 جندي ( بمعني جنيه مصري ) ولو انا طلعت صح تبعتلي 100 جندي , قشطة أ معلم ؟!؟!

طبعا اليومين دول عالفيس كل بيدج فيها فانز كتيرة وحابة تعمل شو ظريف , يروح الادمن جايب صورة لبنات من بتوع الدول الاوروبية ويتكتب عليها تعليقات زي :-

" مسيرك يا ملوخية تيجي تحت المخرطة " , " هي الإصدارات دي مبتنزلش مصر ؟ " , " فين بناتك يا مصر تشوف ! " .

ماشي أ معلم !! يعني هم بيحبوا البنات بتاعه بره عشان لابسه قصير وشعرها حلو وعينيها مش عارفة عاملة ازاي !!

جميل . . .

طب في حين بقي ان لما نلاقي بنات مهتمين بنفسهم او عادي عندهم انهم يلبسوا قصير او يعملوا زي الاجانب تلاقي الناس اللي كانت معجبة وبتريل علي نفسها فوق دي معارضة الموضوع جداا وبتوصفهم بابشع الشتايم

يعني بره يعملوا اللي هم عاوزينه ويتوقف لهم احتراما ( قصدي عالشباب طبعا , بلاش الدماغ الزبالة دي! ) واحنا نتكبت ويتقال علينا وحشين !

انفصام صح !! والله العظيم انفصـــــــــــــام !!

المشكلة مش في كده وبس ! المشكلة ان من كتر ما الكلام ده بقي يتقال بدأنا احنا _ كبنات مصر يعني _ نقتنع بان احنا وحشين وان بنات بره احسن مننا , فاحنا مهما عملنا مش حنبقي زيهم , وبكده عزيزي الشاب بقيت السبب الرئيسي في فقد معظم البنات للثقة بالنفس

وكمان لما تلاقي بنات بتتدلع يقولك ايه السهوكة دي وايه الحركات المايصة دي ويتبص للبنت علي انها قليلة الادب ومنحطة ولازم نقيم عليها الحد ,, فاحنا _ كبنات مصر يعني _ قررنا اننا منتسهوكش واننا نبقي صدغ كده فبقينا _ كبنات مصر يعني _ نلبس كوتشيهات وشيميزات ونسمع مهرجانات , ده حتي كلامنا بقي شبهم !! ,, بعدين طلع لنا الكائنات المدعوه بالــ " شباب " يقولولنا  فين البنات وفين الفساتين والانوثة راحت

لا والبجاحة بقي لما يقولوا " انتوا معندكوش وسط ! " ,, وسط مين يخويا !! يعني البس فردة كوتشي وفردة صندل ! ده مجنون يا عم . . .

وحكاية ان البنت متحطش صورتها عالفيس دي , اصلها كده تبقي زي السلعة وبتعرض نفسها ,, فكرة انها بتعرض نفسها دي جت منكم انتم من كتر ما انتوا حاطين الفكرة دي في دماغكوا وبتتعاملوا بيها مع كل الناس .

مهو لو انا حاطة صورة لنفسي وانا عريانة مش زي ما احط صورتي وانا بالشكل اللي الناس بتشوفني بيه في الشارع ,, مين فيهم بقي اللي يبقي سلعة !؟

مش كده وبس , لا في بنات كمان بتفكر بطريقة غريبة , بنات بتفكر في ان لو اي بنت عملت اللي نفسها فيه تبقي غلطانة , طيب إزاي بنطالب بحرية المرأة والتحرر والكلام ده واحنا مبنطبقش ده علي الارض .

الصورة دي نزلت علي بيدج و كان مكتوب عليها الآتي : " تتوقعوا لو ده كان بوستر فيلم كان حيبقي اسمه ايه ؟ " وده كان الرد . . .

انا مش مضايقني الكمنتات قد ما مضايقني انهم من بنات:(

طيب دول ناس عايشين حياتهم بطريقتهم , مالك يا تنح انت وهي بيهم !! وليه اساسا تعرضوا الصورة بالطريقة دي !! الله اعلم لو اتولدت في بيئة زي بيئتهم كنت ممكن تعمل ايه !

والبنات اللي بتقعد تناشد بالحرية للمرأة وتزعق وتصوت دي واول ما تخرج مع راجل تسيبة يدفع الحساب ! هو مش بردو مفيش فرق بين رجل ومرأة بينما الفرق بيبقي بين انسان وانسان !! ولا عند الدفع تصدري الطارشة !

اكبر مثال علي ان الحرية مش عيب هي ميام محمود يعني هي محجبة (1) بتغني راب (2) محترمة (3) بتعرف تفكر وتتكلم (4) واظن دي حاجة واضحة يعني ,, اصل مفيش حد حيكتب كلام بالشكل ده ويبقي مبيعرفش يفكر !! الدنيا اتهدت بقي عشان بتغني وهي محجبة !!

يا جماعة انتوا بتضحكوا علي نفسكوا وربنا !!

حاجة اخيرة ودي ملهاش علاقة بالبنات اوي ,, ياريت كل واحد يشوف نفسه ويشوف اخطاؤه ويحاول يصلح من نفسه , مش بس كده ! لا ويعيد تفكير في كل حاجة هو شايفها , سواء صح او غلط ويبطل يحكم علي الناس لمجرد ان هو مش لاقي حاجة يعملها  ,, لان اللي بيعمله ده اكبر دليل علي انه تافه وعاوز يظهر للناس باي شكل ,, والحرية اللي احنا بنطالب بيها دي حتتحقق لو بطلنا ننقد في اللي رايح واللي جاي بدون اي وجه حق

احنا بالظبط عاملين زي راجل نازل مظاهرة تؤيد حرية المرأه وبيتصل بخطيبته يتفق معاها انها حتسيب الشغل بعد الجواز

Penulis : Unknown ~ Sebuah blog yang menyediakan berbagai macam informasi

Artikel كبنات مصر يعني ini dipublish oleh Unknown pada hari February 28, 2014. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 0 komentar: di postingan كبنات مصر يعني