في بيتنا دكتور

المفروض بل الطبيعي في اي اسرة , ان لما حد بيعيي بيودوه للدكتور ,, وبما ان احنا مصريين فالقاعدة دي مبتطبقش علينا ! عشان نبقي واضحين يعني . . .

عندنا الام والاب بيقوموا بوظيفة الدكتور ويمكن اكتر شويتين ,,

يعني مثلا لو بطنك واجعاك , مش بيفرق بقي بطنك واجعاك سواء عسر هضم ولا ديدان ولا قولون , هو العلاج معروف إلا وهو انك تشرب جنزبيل باللبن او ممكن تخش الحمام او ممكن تشرب من دوا الحساسية بتاع اخوك ,, وغالبا تفسير حدوث وجع البطن ده عند الام بيبقي لانك بتاكل اكل من بره ومش بتحافظ علي صحتك وبتغير هدومك وانت فاتح الشباك . . . حد فقيق حيسأل ايه دعوه ده بالبطن !! لا يا معلم ليه علاقة طبعا , بس العلاقة دي محدش يعرفها غير الامهات ,, فانت ممكن تتكرم وتروح تسأل مامتك لاني لحد دلوقتي معرفش الصراحة ,, ممكن لما اكبر واتجوز واخلف افهم النظرية دي . . .

لو عندك برد لازم تتدفي كويس وتاخد مجموعة البرد او ممكن كفامول اللي هو الشريط اللي مرمي عندكوا في البيت بقاله 18 سنة ده ومبيخلصش وطبعا البرد ده جالك لانك خففت هدومك او استحميت بميه ساقعة وانت جسمك سخن او ممكن تكون  عشان غيرت هدومك وانت فاتح الشباك , بردو !

في حالة ان عينك تكون واجعاك دي مفيهاش كلام انها تعباك من السهر ادام النت طول الليل , لا والعائلة المصرية في موقف قطرة العين بتعمل زي ما نصحنا رسولنا الكريم _ عليه افضل الصلاة والسلام _ في اتقان العمل بالظبط ,, تلاقي ابوك نادي اخواتك الصغيرين واحد يقعد علي ايدك والتاني عالايد التانية والتالت ماسكلك راسك بتبقي نايم في وضعية نجمة البحر كده ومش بعيد تلاقي حد كمان فاتحلك عينك ,, يا عيني مبيحبوش يتعبوك معاهم , بعد اما القطرة تتحط في عينك لازم طبعا يقولولك الجملة الفاكسانة بتاع المصرين دي " متقفلش عينك عشان القطرة متطلعش بره " . . . وبعد كده ده ينزلوا في الجرايد " تزايد اعداد المهاجرين المصريين لدول الخليج والــ . . . " مهو من اللي بتعملوه فيهم يا كفرة ! انتوا لو سايبينهم في حالهم مش حيجرالهم حاجة .

وياسلام بقي لو اتعورت في رجلك ولا في ايدك,, في بتاعة كده لونها بنفسج اسمها " جنتيانا " , البتاعة المعفنة دي لو ملقيتهاش في بيتكوا ! تحري عن جنسية باباك ومامتك عشان احتمال كبير يطلعوا مش مصريين . . . المهم البتاعة دي بتتحط علي قطنة وبعدين عالجرح علي طول ولو مفيش قطنة الام بتستخدم خرق التنضيف بتاعة المطبخ , تتميز الـ"جنتيانا " بميزة مهمة جدا ألا وهي اللحوسة ,, حضرتك تحط القطنة من هنا عالتعويرة وعينك ما تشوف إلا النور ,, إذ فجأة تصبح المساحة المحيطة بالتعويرة بـ 15 سم مربع لونها بنفسج , يعني لو البتاعة دي لونها احمر ممكن نستخدمها في تنكر الفامبايرز , والله تعمل شغل عالي اوي .

ورق الجوافة ( مع موسيقي خلفية السلام الوطني طبعا ) , ورق الجوافة ده يصلح لجميع الامراض والاوبئة , برد ماشي , صداع ماشي , تسلخات ماشي , حتي لو انت مفاكش حاجة تغليه وتشربه بردو , ميجراش حاجة الوقاية خير من العلاج .

تحس أن اوبشن الكشف ده حاجة قليلة الادب .

وعندك بقي المدارس , الست اللي هي اسمها الحكيمة دي عندها برشام اصفر كده لو عندك إيه باللذي بتديهولك , ونفس الست سبحان الله هي اللي بتقيس الطول والوزن ,, عارفين انتوا الميزان الفظيع ده ! ايوه اللي هو المؤشر بيتحرك حتي لو محدش واقف وهي هي الست اللي مبتديش تصريح خروج إلا لو عارفة مامة البت .

علاج ايه يا عم الحج احنا ضعنا خلاص !! لا والوقاية دي مبتطلعش غير في اوقات معينة بتتحدد علي تركيبة دماغ الام والاب . . .

ابوس إيديكوا يا جدعان مش في اي حاجة كده تدوسوا ,, طب انا حقولكوا حاجة حصلت حقيقي وادام عنيا ,, انا اعرف واحدة قعدت شهرين تشرب في زيت زتون علي اساس ان القولون بتاعها تاعبها وطلعت في الآخر حامل !!

Penulis : Unknown ~ Sebuah blog yang menyediakan berbagai macam informasi

Artikel في بيتنا دكتور ini dipublish oleh Unknown pada hari February 11, 2014. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 0 komentar: di postingan في بيتنا دكتور