شئ لم تمر به, لن تفهمه !

 

النهارده رحت الدرس بتاعي وكان لسه بدري اوي ,, فقعدت علي سلم كده المهم وفتحت المذكرة وقعدت اذاكر شوية لحد ما يبدأوا , وانا قاعدة كذا واحد عدي وقعد يبسبس ويقولي " تعالي ذاكريلي " واللي يقولي يا " ابلة " وسمعت كلام مش حلو . . .

طيب دلوقتي ايه الغلط اللي انا عملته عشان يحصلي كده ؟! انا قاعدة دلوقتي لا جسمي ولا حاطة ميكب ! طيب مهو اي ولد لو كان قاعد نفس القاعدة دي مكانش حد حييجي جمبه بل والمتوقع ان محدش حيفكر فيه لجزء من الثانية ,, في حين ان بنت اللي تبقي قاعدة تبقي عرضة للكلام البذئ .

وفي الاخر ممكن يقولوا عليا كلمة " شمال " ,, صحيح هو ايه تعريف كلمة " شمال " ؟

لما تسأل اي ولد السؤال ده حيقولك الآتي :-

" البنت الشمال بيبان عليها ,, يعني اللي بتيجي جامد في الهزار او بتهزر بالايد او اللي تكون عندها القابلية انها تبقي سايبة مع اي حد كده وخلاص"

بينما لما يحصل اي موقف ادامك تلاقي رايهم غير كده خالص ,, يعني ممكن نفس الولد اللي قال الكلمتين دول فوق لو شافني وانا قاعدة عالسلم يقول عليا شمال ,, طب ليه التناقض يا عم الحاج ؟! الظاهر ان التناقض ده بقي اسلوب حياه . . .

كتير اوي من البيدجات عالفيس اليومين دول تنزل صورة للبنت وهي عاملة لفة الطرحة اللي بيسموها " خارجة من باب الحمام " وكاتبين مقالة طويلة عريضة عن البنات اللي بيعملوها ,, السؤال هنا بقي " وانت مالك ؟! "

زي ما احنا بنمشي ومبنتكلمش علي بنطلوناتكوا الساقطة لحد الركب والبنطلونات الضيقة السكيني اللي هي اصلا بتاعة البنات اللي بقيتوا بتلبسوها ولا شعركوا المكتكت اللي يصيبنا بالغثيان ولا الوانكوا الملخبطة اللي بتجيب حول لا إرادي أنتوا كمان ملكوش دعوة بينا .

احنا البنات معترف بينا في المجتمع ظاهريا وليس جوهريا , انما ظاهريا المرأة واخده حقها وزيادة , وده في وجهة نظر الحكومة يتمثل في المطلقات والارامل , يعني بأختصار لازم يكون عندك مصيبة في حياتك عشان تاخدي حقك من الحكومة ,, وياريته نافع !! الواحد بيشوف عجايب في الجرنال كل يوم !!

غير بقي النقد اللي من بيتقال من ناحية الجنس الآخر ,, يعني اي حاجة بنعملها بنتنقد عليها ,, يعني لو واحدة بتشتغل تبقي هي اللي بتبهدل نفسها ولو مبتشتغلش وقاعدة في البيت يبقي جوزها كاسر عينها مهي مبتشتغلش يعني هو حيأكلها ولا حيخرجها ويجيب لها اللي هي عاوزاه !

احنا لو شلنا القوة الجسدية من الرجل حيتساوي مع المرأة, بس للأسف ان احنا في مجتمع مفيش حاجة بتمشي فيها غير بالدراع عشان كده حق المرأة ضايع

ويطلع لك رجاله في التليفزيون تقعد تتكلم عن البنات اللي بيتم التحرش بيهم ويكأن الطبيعي انه يحصل كده بدال بنت نازلة من بيتهم .

والواحد لو قعد من هنا لبكره الصبح يتكلم عالحاجات اللي بتحصله مش حيدي للموضوع حقه ,, البنات تفسها توصل للرجاله يعني ايه " تحرش " ,, يعني ايه في وقت تكون ماشي فيه في الشارع في دماغك مليون حاجة و مليون موضوع وييجي واحد بكل بساطة يمتع نفسه بحاجة مش بتاعته وبمبرر ان البنت هي اللي اثارته ,, مهو لو الحكاية ماشية كده ,, محدش ييجي يحاكمنا لما نعور حد في وشه نعمله عاهه والتبرير بقي حيبقي " وشه استفزني " وساعتها بقي محدش يقدر يعملي حاجة , مهو زي ما انتوا مبتعملوش قواضي ولا بتحبسوا الناس اللي بتتحرش بالبنات خلاص متعملولناش حاجة لما نعورهم

بس ايه اللي حيحصل في الآخر يعني ؟! حيفضلوا يتحرشوا واحنا حنفضل نعور ؟ طب وبعدين ؟! مهو مش حينفع نقضي علي وحش بوحش . . .

الحل الوحيد ان احنا _ البنات يعني _ ياخدوا حياتهم علي انهم ضيوف علي الدنيا وعلي كوكب الأرض وعلي الرجاله كمان ,, وساعتها بقي الدنيا مش حتبوظ !! ده مش حيبقي في دنيا اصلا . . .

لما يكون حلم بنت ان يوم واحد في حياتها يعدي من غير اي مضايقات . . يبقي في حاجة غلط !

Penulis : Unknown ~ Sebuah blog yang menyediakan berbagai macam informasi

Artikel شئ لم تمر به, لن تفهمه ! ini dipublish oleh Unknown pada hari March 27, 2014. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 1التعليقات: di postingan شئ لم تمر به, لن تفهمه !