ثانوية والحياة مهلبية

اول السنة داخل مبسوط

معايا كتبي وشنطتي وهدومي مقاسها مظبوط

اتفاجئت بمدرس بيقول يا ابن الـ*** يا نتن يا هلفوط

بيعاملنا معاملة زبالة ويكأننا قوم لوط


شلت من نفسي وقلت مش مهم

دخلت المس وفي فلوس عمالة بتلم

يا ستي صلي عالنبي ده احنا لسه في اول التيرم

قالت لنا : " دول لتزيين الفصل وتنضيف الطرقة ومحدش يقولي مش ضروري ومش مهم "


يا عم مش مشكلة عديها

راحت مدرسة داخله وهي راسمالنا عينيها

بتقول لنا التربية الإسلامية دي مادتي وانا اللي حديها

بتكلمنا عالحجاب والاوصة واصلة لحد عينيها

والحلق فاضلة شوية ويوصل لحد رجليها

عمالة تتكلم عن الاخلاقيات و الادب وهي اول واحدة مبتعملش بيها

قلت مش مشكلة ال يعني هي واقفة عليها !!

ما التربية دلوقتي بقت هجايص وقليل اوي اللي بيتمسك بيها


والحصة اللي بعديها كانت انجليزي

نفختنا بـ " كانتاري " و " سانكس " و " امبالانس " و " إيزي "

مبتنطقش معانا ليه يا عزيزي

اصل المس عندها عقم لغوي غريزي


ودخل بعديها مدرس الفرنساوي

مش هيئة مدرس , ممكن تقولوا كده حاوي

ودخلته علينا فل , وشكله عالشر ناوي

ما تشغل لنا حاجة تفرفشنا كده يا ببلاوي


واقول ايه علي معمل الأحياء

مدرسين المادة درجاتهم بالاهواء

كل الطلبة عندهم سواء

ما عدا فاطمة بنت ميس نجلاء


واللي يدخل يقولك خد عندي دروس

وهو كل همه الفلوس

ولو مبتاخدش عنده يقولوا عليك منحوس

اصلك كده خرجت من الفردوس


فردوس الدرجات واعمال السنة العالية

و الناس اصلا بتجري علي عيالها ومش لاقية

الأكل أهم , بلا دروس بلا داهية

عربي ايه و انجليزي ايه , ابعد عني انا مش فايقة


ويا سيدي يا سيدي عالامتحانات

تدخل اللجنة تندهش من كمية المفاجآت

تحط ايه علي ايه عشان يديك برمنجانات ؟؟

وبيجري في دماغك كتير من التساؤلات


هو ده علينا في المنهج ولا انا بيستهيألي ؟

هو المفروض بيتحط صوديوم ولا بيض مقلي ؟؟

استنوا استنوا ده المستر قبل كده قالي

افتح صفحة 30 حتلاقيها في الطيف المرئي


الضوء دخل في التفاعلات

ومن جوايا فحم بيتقاد

من الاستعارة والتشبيه والكنايات

انا احسنلي اعيش بين النفايات

واخلف سعيد وحمدية وعنيات

والله بفكر في كده ساعات

يرجع قلبي يفوقني , واتعاتب من الدقات

عالاستسلام اللي بستسلمله في كتير من الاوقات

بس انا مش حستسلم تاني واتحدي كل المشكلات

عشان بعد كده تتعارك عليا الصيدليات 

واشفي ده واداوي ده وارحمهم جميعا من الابتلاءات


يارب اديني القوة عشان اكمل

ولو ده حيخليني اتحول لعربجي حتحول

المهم مسبش ابدا كلام يتقول

علي طالب فقد عزيمته ودلوقتي بيتسول


 يبقي مستوانا عالي وننول الاحترام , اكتر من كده مش طالبين

لا زويل احسن مننا ولا غاندي ولا طه حسين

حنكون كبار اوي حتي ولو لاختلاف ما بينا كان في الدين

من الاخر كده حتكسلوا ولا حتبذلوا جهدكوا وتكونوا ممتازين ؟؟

Penulis : Unknown ~ Sebuah blog yang menyediakan berbagai macam informasi

Artikel ثانوية والحياة مهلبية ini dipublish oleh Unknown pada hari June 18, 2013. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 0 komentar: di postingan ثانوية والحياة مهلبية