نعرف سواق اسمه عم يوسف _ بيوصلني كل يوم خميس لدرس الاحياء بتاعي انا و2 صحابي عشان المنطقة بعيدة ,, مسيحي بس ده مش بيأثر علينا في حاجة يعني , ما عدا اللحظات اللي بابا بيناديه فيها بــ " حاج !! " _ المهم ,, الراجل ده كنا قاصدينه في مشوار لحد الهانوفيل كده _ منطقة في إسكندرية _ ,, انا متأكدة 100% ان عمو يوسف راجل _ إلي حد ما فاضي , وإلا مكانش يبقي حافظ نص الاغاني بالمغنيين _ بيحاول يتكلم او يقول اي كلام وخلاص ,, فبيقول لبابا وماما " بنتكوا دي ميـــح , متعرفش ولا منطقة من اللي بنعدي عليهم " ,, راح بابا رد " احنا بنتنا متعرفش الحاجات دي " و ماما ردت " احنا بناتنا ملهاش في الكلام ده " . . . .
هو اللي بقي عارف مناطق كتير اليومين دول بقي انسان قليل الادب ولا ايه ؟؟
انا عارفة ان ممكن بابا وماما ميكونش قصدهم ,, بس ايه المغزي من الجملتين دول يعني ؟؟ طب ما انا رحت مناطق كتيرة جدا كنت اول مرة اروحها ولوحدي , ايه اللي حصل !!
يعني هم وصل بيهم التفكير ان البنت لما تكون عارفة مناطق كتيرة تبقي لافة ودايرة و " شمال " ؟؟
واللي بيرعبني , اني اتخيل نفسي بقول علي بنتي كده او مثلا اسمع ابوها بيقول كده !!
انا عن نفسي ححاول علي قدر الامكان اخليها عارفة _ زي ما انا متوقعة من نفسي يعني _ وفاهمة ودايرة ومش " شمال " لانها كده حتبقي عارفة تتصرف إزاي ,, لو وقعت في مشكلة متعلقة بالشوارع حتعرف تتصرف ,, ممكن ده يخلي عقلها واعي شوية . . .
انا ممكن اكون مكبرة الموضوع , بس بجد احنا مظلومين اوي ,, مش معني اني بتكلم علي طبيعتي او اني فاهمة وعارفة الشوارع ابقي غلط ,, التحجيمة اللي الناس بتحط البنت فيها دي غلط . . . أمتي نفهم !!
0 التعليقات:
Post a Comment