" منشية منشية منشيـــــــــــــــــة !! منشية أ حاج ؟! . . . . منشية أ مودام ؟! . . . . منشية أ مزمزيل ؟! "
تحس انك في سوق هدوم , دول لو قاصدين ميخلوش الناس تركب مش حيعملوا كده !!
لا وتدخل الموقف من دول ( اللي هو أصلا مش موقف بس هم كام ميكروباص اخدوا حتة من الشارع وعملوها موقف , طبعا مهو مفيش لا نظام ولا حكومة ولا نيلة . . . ما عليـــنا ) تلاقيهم بينادوا علي الحتة اللي رايحينها بطريقة تحسسك انك غلطان وعامل مصيبة , يحسسوك بالذنب انك خرجت من بيتكوا , وكمان ييجوا عليك كده وهم بيتكلموا تحس انك متهم واقف في محكمة وهم عمالين بيستجوبوك ,,
الموقف ده مش بيفكركوا بحاجة ؟! انا بيفكرني بفيلم عيال حبيبة لما حسن حسني ورامز جلال و محمد لطفي قاعدين عشان يعملولها محضر وعمالين يشاوروا عليها بصوابعهم . . . ولا بلاش موضوع الصوابع ده الا اتاخد امن دولة ولا حاجة !!
المهم . . . وبعد اما تفوق من الصدمة تحاول تفتكر المكان اللي انت رايحة , بصراحة بعد اللي حصل ده حقك تنسي ,, اهم حتة بقي لما يعرفوا انك رايح الحتة اللي هم بيركبوا لها . . . هنا تبدأ لعبة ( سيب وانا أسيب ) , في جزء من الثانية تلاقي نفسك ممسوك من كلتا يديك ,, زي لما كانوا بيعذبوهم ايام الجاهلية ,, كانوا يربطوا ايد في حصان من هنا وايد في حصان تاني من هنا ويخلوا الحصانين يمشوا لغاية اما الايدين تتقطع . . . ما علينا .
بستعجب اوي من السواقين اللي كل اما يلاقوا زبون يقعدوا يحلفوا بالطلاق ليركب معاه ,, طيب يعني حلفان الطلاق ده ايه ظروفه ؟! يعني هو فعلا بيروح يطلق مراته ؟! ولا حلفان مركبيه ؟! متهيالي حلفان مركبية عشان لو كان ده فعلا حصل كنا حنلاقي 3000 واحدة واقفين علي ببان الجمعيات الخيرية بدل من ال1000 . . . احم , نكمل ؟؟
بعد اما القدر يختار لك انهي سواق من ال80 اللي ادامك حتركب معاهم . . وده من حسن حظك _ من وجهة نظر السواق أكيد _ يبيدأ يخليك تفك من الحالة اللي انت فيها , يعني مثلا لو انت راجل ممكن يديك سجارة او يخمن مهنتك ويقعد يجرك في الكلام , او لو بنت ( زي حالاتي كده ) يكلمك علي السواقين وان المفروض البنت تتاكد من العربية قبل ما تركب مع السواق + ابتسامة لو خبراء الاسنان شافوها حيضربوا نفسهم بالنار . . .
وكمان بتشوف البساطة في لغتهم . . . حقيقي بحبك يا عمو السواق 3> 3>
0 التعليقات:
Post a Comment