( الممنوع مرغوب )
كل الناس بتقول الجملة دي , خصوصا الابهات ( الآباء يعني ) لما مثلا يقول لابنه متاكلش شيبسي ويمنعه منه وبعدين يفتح شنطته يلاقي فيها كياس متكرمشة ,, طبعا الاب من دول يتنرفز ويروح لابنه ويفكعه قلمين ( يضربه بالقلم يعني ) ويحرمه من المصروف وكلام الافلام ده كله .
يا جدع ما تسيبه يجرب , والله مجتمعنا بيخاف اوي من انه يجرب , الام تخاف علي بنتها من انها تكلم ولاد او يبقي في تعامل فتقعد تقولها لا لا لا لغاية اما تكبر وتبقي مش فاهمة اي حاجة في اي حاجة ولما تتخطب ينضحك عليها وفي الاخر تلوم نفسها عشان متعاملتش مع ولاد وباللغة الشعبية ( اتودكت ) والراجل ده لو ساب ابنه ياكل شيبسي ( كمثال يعني ) وبطنه وجعته وراح للدكتور حيبطل بعد كده ,,
هو الموضوع صعب , انا عارفة والله ومجربة ,, يعني بدل ما تقول للي ادامك خليك وسطي وتعلمه , لا انت بتقوله ( لا ) عشان تريح دماغك ,, كلنا بنعمل كده , بس بردو لازم نحط احتمال للمستقبل يعني , مع عيالنا وشغلنا وحياتنا حتضادفنا حاجات زي دي كتير اوي ولو بدانا نكبت كل حاجة مش حنعيشوا بقي :( , ولا انت ايه رايك ؟!
يعني البنت اللي بتكلم ولاد من ورا اهلها دي _ معظم الحالات _ بتبقي بتعمل كده عشان اهلها مانعينها من الحاجات دي ,, وطبعا ربنا ادي للإنسان مرض الفضول , بيبقي عاوز يعرف كل حاجة كده زي مامتك لما تقولك متشربش الشوربة دلوقتي عشان سخنة , فانت تروح شاربها , ده مش غباء والله بس هو فضول مش اكتر .
طيب تعالوا كده نحاول نخلي البنات والولاد مع بعض في المدرسة والتعامل بينهم عادي , والله العظيم ما حيبقي في القرف اللي بنشوفه ده ,, يعني فكر الولد حيوصل للبنت والعكس صحيح وحيبقي في تبادل معلومات كده وحناخدوا علي بعض والحياة حتبقي فل , انما بقي افصل ما بينهم وامنعهم , والله لو اتشقلبت بردو حيعملوا العجب من وراك
لكن البنت من دول تبقي متعرفش تفرق بين الالف وكوز الدرة و تتجوز علي انها خدامة , تعمل الاكل و تروق البيت وتراعي عيالها وجوزها , زي الآلة بالظبط , شغاله بريموت كونترول , تعمل اللي عليها من غير ما يبقي في دماغها اي فكر او ثقافة .
والولد كذلك ,, عايش علي انه ولد فيعمل اللي هو عاوزه في البنت _ ولد بقي !! _ ولما ييجي يتجوز , يتجوز واحدة مش بتنزل من البيت ومبتنكشفش علي حد غريب وبتعرف تكسر البندقة بضرسها , اصله ميعرفش ان الطيبون للطيبات ,, يعني انت مش معقول شيطان ولما تتجوز , تتجوز الطاهرة الشريفة ام حسن .
مكن ناس متتفقش معايا , وده طبيعي جدا , صوابعنا مش زي بعضها , انا مش طالبة من اللي بيقري انه يتفق مع كل كلمة انا بكتبها , بالعكس انا بتبسط جدا من اللي بيناقشني ( علي الاقل بعرف دماغه ماشية إزاي )
- أشد سجون الحياة قسوة ، فكرة بائسة يسجن المرءُ مِنَّا نفسه بداخلها.
مصطفى الرافعي
مصطفى الرافعي
( معرفش مين مصطفي الرافعي بس هو اكيد راجل كبارة يعني :) :) :) )
0 التعليقات:
Post a Comment