التحمرش

عايشة في مجتمع بالتحرش مهووس

والشاب جوه خياله التحرش مدسوس

فين زمن الشهامة والرجولة و بالضحكة ينشال العبوس

دلوقتي اللي مبيتحرش فيهم بقي منحوس


منحوس عشان مبيعاكسش بنت

مهو كل العيون بقت عالافلام إياها عالنت

وانا من الحاجات حالتي النفسية بقت زفت

يخربيتك يا يوسف شاهين , علي ابو قناة التت


نظراتهم بتنهش في لحمنا

وكانهم مش بني آدمين زينا

نفسي ينكشحوا بقي عننا

وبفكروا شوية بعقلنا


دي البنت ياما من التحرش بتشوف

نفسها تشيل القرف ده ولو بشادوف

نفسها تغير الفكرة دي ولو بمكنسة وجاروف

تشيل بقي عته و غباء الشحتوف

اللي بيبقي عالبنات دايما محدوف



فيها ايه لو اتمسكنا بالاخلاق

تخلي البنت تمشي متطمنة في اي زقاق

تاخدها مشي من اسكندرية للوراق

وميبقاش في فرق بين الرجال والنساء


ياما نفسي اصرخ باعلي صوت فيا

وانادي يا ناس بالاحترام والحرية

حريتي حدفع تمنا غالي ,بس ده ليكوا كمان مش بس ليا

عايزين حرية واحترام ولقمة هنية

اظن دي مش كبيرة عشان نعيش حياتنا دية

 ده ربنا اوصي بينا في القرآن و نولنا محبة نبوية


حبس وضرب و دوسان علينا بالاقدام

حكموا علي عقولنا بالنقص والتوهان

وسجنونا في قيود الاسرة والاولاد والحمام المحشي و البتنجان

بس ميعرفوش قدرتنا علي قلب ترابيزة الزمان

ونقدر نحول المنجم لابو قردان

ونجيبك من افاك ولو كنت في اي مكان

نروح بيك البحر ونرجعك عطشان

العب بينا وحتبقي انت الخسران


جوه اعينكم اجسامنا محفورة

ولاون اسمائنا مش كلها محفوظة

كل عرق بينطق بتدليعه صغيورة

من " حبيبتي " و " قلبي " و " عمري " لحد "سنيورة "

متبقاش سايح زي المية خليك شبه النافورة

تدي شكل حلو والناس تبقي مسرورة


حس بألم البنت اللي مش قادرة تتكلم

ومن افعالك الدنيئة بقت بتتألم

امتي بقي يا راجل حتتعلم !

كرامتك وقعت منك و رجولتك بقت من الارض بتتلملم


لو فاكر بعد اللي عملته ده انت راجل تبقي غلطان

الكلمة دي مش بتوصف حد *****

كلمة " ذكر " تتمسح من بطاقتك بجومة ميلان

وبص في المراية وابقي قابلني لو لقيت انسان


كلمة انسان تتقال علي حد فعلا بيحس

مش علي حق واحدة بايديه بيمس

عضلاتك في ثانية تبقي فــس

روح اشتري جيبه وبيع البنطلون والسلبس


افتح مخك معايا وفوق

متبقاش زي السمك المحروق

لا نافع تاكل ولا حتي تدوق

امسك الدركسيون ومتخليش غرايزك تسوق

دي بنت لذينه توقعك في شر اعمالك وتسيبك مزنوق


 الدنيا دي محل وانت الزبون

وبايديك تكتب " ذكر " عالبون

يا إما تعيش بقية عمرك ملعون

احسنلك تتنفس زي الناس اكسجين مش ثاني اكسيد كربون

Penulis : Unknown ~ Sebuah blog yang menyediakan berbagai macam informasi

Artikel التحمرش ini dipublish oleh Unknown pada hari June 18, 2013. Semoga artikel ini dapat bermanfaat.Terimakasih atas kunjungan Anda silahkan tinggalkan komentar.sudah ada 0 komentar: di postingan التحمرش