سلامو عليكوا ,,
انا حخش في الموضوع علي طول وبلا مقدمات عشان انا عندي ثانوية عامة ومش فاضية الصراحة :( .. أحم أحم ,,,
بتلاقي في بنات كتير اليومين دول بيتصوروا فيس بوك ستايل ومش عارفة عاملين ايموشن زعلان وايموشن اندهاش ,, والله احنا مش تافهين ,, ده حتي الواحد والله عنده هم ما يتلم ,, بس مفيهاش حاجة لما يبقي في شوية هبل في حياتنا كده ,, يعني بص لحياتك انت وصاحبك كده ,, طول النهار شتيمة ويا إما بتتكلموا في انكوا معكوش فلوس يا إما ساكتين وقامطين ومكتئبين ,,,
بقي دي حياة يا راجل !!
لا واللي تلاقيه مقتنع بكده وبدأ يعيش حياته بانه يتصور ويضحك يقولوا عليه " نايتي " و " قلب امك " و " يا سيد امك " !!
هي الفرحة مكتوبة علي البنات بس يعني !!
زي بالظبط موضوع الطبخ والرقص ,, يعني المعروف ان الطبخ للبنات وكده بس تلاقي شيفات رجالة احسن شيفات في مصر وفي العالم ,, مهم رجاله اهم مقولنالهومش ليه اقعدوا في بيوتكوا !! ,, وفي Arabs Got Talent كذا واحد طلع رقص رقص شرقي ,,
انا عندي نظرية رفيعة كده بس ,, ياريت الحاجة اللي تقدر تشارك فيها المرأة متقللش من رجولتك ,, بمعني اوضح انك ليك الحق كله انك ترقص زي البنات لان زي ما المرأة بتشارك الرجل في العمل علي الارض هو لازم يعمل شوية حاجاة بتعملها هي كمان ,, زي موضوع الطبخ ده مثلا ,, بس الطبخ ده حاجة جميلة ,,
بس يعني هو اللي خلق الطبخ مخلقش غيره حاجة تشاركها مع الستات !! يعني كل المهن اتفرمت تحت قطر الفيوم ومنجاش غير الرقص !!
حد فقيق حيطلع يقولي ما انتي رافضة الموضوع اهو ,, لا يا ابو لسان طويل ,, لا يخويا مش رافضاه , انا بس عاوزة احط كل حاجة في مكانها ,,
طيب امشي كده في الشارع وبص في وشوش البنات والولاد ,, طب والله ما حتعرف تفرق . . .
اللي تلاقيه شادد شعره من ادام ونافشه زي الديك البربري من ورا كده ولابس نضارة ملونة وبنطلون ملون وتيشيرت ضيق مسخرة كده !! طب ده يتقاله ايه ده !؟
مبقولكش البس بدلة بس لكل حاجة حدود يعني !!
والبنات تلاقيها قاصة شعرها , او ساعات تلاقيها ملزقاه علي وشها كده وعاملة سموكي !! اللي زي دول ببقي عاوزة ادوس بنزين علي رجل السواق وادوسهم !!
فيــــــــــــن اياااااام الفساتين !! انا عارفة ان ده مش شرط علي البنت بس بجد احنا مفتقرين اللمسة الانوثية في المجتمع ده
بس يعني بعد البنت تكبر وتشوف اللي بيحصلها في مجتمع زي ده لازم تطلع معقدة طبعا !!
وبالنسبة لموضوع المرأة متساوية مع الرجل :-
هي فعلا متساوية بس بشكل غير مباشر ,, يعني متساوية معاه في حقوقها ,,
حد دلوقتي حيقولي ازاي ده ربنا ذات نفسه خلي النسبة بينها وبين اخوها في الميراث 1 : 2 ,, حقوله الأتي :. ربنا عمل كده فعلا , بس خلي اخوها ده يصرف عليها ,, يعني هي حتاخد نسبة ( 1 ) وحيتصرف عليها _ الكلام ده انا سألت فيه ومتاكدة عشان محدش يقول اني بهجص _
متساوية معاه في الشغل مثلا ,, عشان هي عندها قدرات ذهنية وعقلية تتحمل ربنا خلاها تقوم بالبيت كله ,, والرجل عشان قدراته الجسدية و العملية خلي شغله علي الارض ,,
مهو لو خليت الراجل يقعد في حضانة حتلاقي العيال دي دماغهم مخبوطة في الحيطان ومتعلقين من رجليهم علي المناشر
ولو خليت الست تروح تشتغل في المحارة او في اعمال البناء كل شوية حتقعد تقولك ضهري وكتفي وبطني وسناني ومش حنخلص !! ده غير طبعا موضوع الرغي . . . .
فكرة الرغي عند البنات تتلخص في الأتي :-
انتوا كرجالة بتحلوا مشاكلكوا بانكوا تقعدوا منعزلين ومتكلموش حد وبعدين لما تلاقوا حل بتطلعوا وترجعوا طبيعيين ,, احنا البنات بقي مبنعرفش نعمل كده فنضطر نتكلم ,, ممكن نتكلم في اي حاجة في الدنيا غير المشكلة اللي عندنا ,, المهم ان احنا نتكلم ,, ودي طريقتنا , والمفروض انكوا تتقبلوا ده
كمان احنا مش محتاجين حلول ,, احنا عاوزين حد يسمع بــــــــس ,, تعرف تسمع من غير ما تتكلم أ كابتن !!
الخلاصة كده يعني , انا احنا مش تافهين ,, انا عن نفسي لما اموت حبقي فرحانة اني عملت كل الهبل ده في حياتي واختبرت كل حاجة حوليا ,, انما انا مش حيبقي كل همي الفلوس او الحاجات المعقدة دي واضيع نفسي . . .
فكر فيها واعقلها واحكم ,, متاخدش الموضوع من وجهة نظر اللي قبلنا ,, ولو رأيك زيهم محدش حيضربك علي ايدك ,, ربنا خالق لنا عقل عشان نفكر بيه مش عشان نطس الحاجات اللي بنسمعها في ودن اللي بعدينا وخلاص . . .
تنويه : الصورة اللي فوق دي بتاعة " شادي " اللي في برنامج " البرنامج " .
0 التعليقات:
Post a Comment