رسالة للناس اللي بتحط امتحانات الثانوية العامة

انتوا ليه بتعملوا فينا كده !! هاه ؟! وحاة ابوك أ جدع بتعمل فينا كده ليه ؟!

لما الموضوع حرتك يوصل إلي ان الطالب يبقي طالع من الامتحان بيشوف احلامه بتتدمر كده ادام عينيه ويبقي بيعد درجات النجاح بالعافية يبقي في حاجة غلط ! طب بتعلمونا ليه بدال بتيجوا في الاخر و تروحوا قسمنا نصين كده ؟! يعني نقعد نتعلم في ابتدائي واعدادي و سنتين كاملين ثانوي علي :- 1) نطق غلط في جميع اللغات _ حتي العربي يا كفرة _ وبيبقي لازمنا كورسات بعد اما نخلص 2) بنروح المدرسة طول عمرنا بعد الطابور وبننام في الحصص _ ده إذا كنا بنحضرها اصلا ! _ 3) كل الطلبة بتاخد دروس خصوصية والحكومة عارفة ده كويس 4) مناهج توقف العقل مع ان المفروض تنميها 5) مفيش اهتمام باي نشاط , لا رسم ولا موسيقي ولا رياضة وفي الاخر يقولوا العيال بتطلع متخلفة ليه ! مهو من عمايلكوا السودة

وبعد كل النفخ ده تقولولنا ان السنة دي هي اللي حتحدد مستقبلنا وتبقي اول سنة ناخد فيها 7 مواد دفعة واحدة واول سنة ترم كامل مش ترمين ! ما تضربونا بالنار احسن !؟ بتحطونا في وش المدفع ليه يا ولاد الــ . . . .

حتطلع شخصية مستفزة تقول ان الامتحان في مستوي الطالب المتوسط ,, احب اقوله ( امك يا جدع ) متوسط مين يا ابو متوسط !! لو في مستوي الطالب المتوسط فعلا مكانش حيبقي في كل ده ! الاسئلة بنبصلها مش عارفين المفروض نعمل ايه فيها ! لو فعلا جاية في مستوي الطالب المتوسط , كان الطالب المتوسط حيحل والدحيح حيحل والضايع خالص حيكتبله اي كلمتين وينجح والحمد لله ,, انتوا بتعجزونا يعني ؟!

والوزير ولا علي باله ! مصدر لنا الطرشة ,, هو لازم يبقي ابن وزير ولا ابن مسؤول كبير في البلد في ثانوية عشان تجيبوا الامتحانات سهلة !؟ ومحدش يقول احنا اللي مش بنذاكر ! احنا طافحين الدم طول السنة , غير مصاريف الاهالي والضغط النفسي والعصبي .

موضوع الغش ده بقي موضوع تاني ,, حبسطهالك :-

العيال الضايعة تغش ------->> النتايج تطلع حلوة اوي ------->> التنسيق بتاع الكليات يعلي ------->> الناس اللي معرفتش تغش وجابت درجات كويسة بمجموعها متخشش الكليات اللي نفسها فيها ------->> زيادة نسبة انتحار خريجي الثانوية العامة واصابة الباقي باكتئاب مزمن او شلل رباعي .

بس كده هو ده اللي بيحصل لما انت تغش ,, لا والبيدجات شغالة علي ودنوووووو يلا المهم انهم مش خسرانين حاجة ,, ناس عاطلة كل اسبوع الواحد يعمله بيدج ويعمل انفايت لصحابة ويكتب اي هاتش وياخد لايكات عليه من ناس عاطلة واحنا نضيع .

المنظومة اصلا كلها بنت ستين ,, بالظبط كانهم جايبين نملة و فيل و قرد واللي يقدر يخش جوه غطا الازازة هو اللي يبقي كسبان ,, النمل ده بقي الحفيظة ,, ايوه ولاد التيت دول اللي مبيعملوش حاجة غير الحفظ دول

مبدأ الثانوية : " عيش نملة ,, تاكل سكر "

دي ضريبة بندفعها بسبب كونا عايشين في بلد زي دي بنظام تعليم زي ده بشعب طول عمره حاطط جزمة في بؤه ولا عمره اتنفس ,, خلاص كل حاجة راحت . . .

READMORE

وراثة العادات والتقاليد

احنا كمصريين عندنا كده عادات وتقاليد حيرت دول العالم كله ,, عندك مثلا :-  مينفعش نعمل كحك عشان خالو لسه ميت من 3 سنين! انما نجيب من محل حلويات اوك ماشي خالو مش حيزعل!

والموضوع تطور ووصلت العادات والتقاليد لطالب الثانوية العامة بذات ذاته , يعني لو مقعدتش 24 ساعة عالكتاب تبقي مش نافع ومش حتنجح وانت اخرتك حقوق والاسطوانات اللي انتهت من ايام الحملة الفرنسية دي. وبعديها يبدأ المسلسل المعتاد في كل بيت مصري ألا وهو :-

مامتك تزعقلك ------->> انت متديش ريأكشن ------->> تروح مسخنة ابوك عليك ------->> ابوك يتنرفز

وبعد المعادلة الصعبة اللي فوق دي تلاقي ابوك داخل عليك وانت مثلا ماسك الموبايل ( ودي حاجة تثبتله اللي امك قالته حتي لو قاعد 8 ساعات بتذاكر قبلها ) ويروح قالع الحزام وتعيد انت وهو فيلم الكرنك, عشان اكون محددة اكتر من كده مشهد فرج و سعاد حسني .

هم مش فاهمين فكرة ان الفيس او تويتر ده حاجة يومية بالنسبالنا زي الطبيخ بالنسبة للام وزي الزعيق بالنسبة للأب .. أحم أحم .

ما علينا !

الفكرة بقي ان العصر اللي احنا فيه دلوقتي , عصر كمبيوتر ونت . . . بإختصار عصر السرعة .. واحنا في العصر ده بنعيش مع اهالينا بتعاليمهم القديمة اللي احنا مش مقتنعين بيها ,, التعاليم دي اللي ورثوها و معظمهم مش بيفكر اذا كانت صح ولا غلط , هي طبعا مش كلها غلط, بالعكس في جزء كبير اوي منها صح بس فكرة " هذا ما وجدنا عليه آباؤنا واجدادنا " دي فكرة بتودي في داهية.

طيب احنا كجيل جديد ازاي حنتخلص من عقده وراثه التقاليد دي ؟!

انا في رأيي _ اللي ملهوش اي لزمة _ ان الموضوع ده ممكن يقف عندنا وميكملش معانا _ كجيل جديد يعني _ بمحاربة التفاهة .

البت اللي تقعد تزن علي وداني نص ساعة في ازاي بتعمل كابوتشينو موكا ( علي اساس يعني انه لو كابوتشينو بالموز كان حيبقي بطريقة مختلفة ) والبت اللي تقضيها عالفيس " باد مود " و " فيلينج لايك هيل " و " اتس سو هارد فور مي " لمجرد انها مش عارفة تسلك الهاند فري بتاعتها .. أحب اقولك كـــــفـــــــــايـــــــــــة يـــــا تــــــــافـــــــهـــــــــة .

يعني نبص بصة كده لنوع من البنات ,, خليكوا معايا من فضلكوا . . .

قبل الجواز :

=======

تلاقيها بسكوتة كده وكتكوتة و من كتر الرقة لو ضغطت عليها شوية حتطلع كريمة.

بعد الجواز :

=======

أجارك الله! لو جربت تحطها كده جنب بتاع الانابيب مش حتلاقي فروق كتيرة .

تلاقي الواحدة من دول اول ما تتجوز تروح قاعدة من الشغل بحجة انها تراعي البيت ( دي مهمة سامية علي فكرة انك تسخري حياتك في خدمة جوزك وعيالك وانك تطلعيهم احسن ناس ) المهم ,, تقضي بقي وقتها مسلسلات تركي و افلام هندي , وما ادراك ما التركي وتقعد تاكل وتحشر ولما تخلف كمان كام سنة تسيب الواد يتفلق من العياط وتسيب الاكل عالنار وتقعد ترغي في التليفون مع صحبتها علي ان " ام بنت اخت جوز خالة مرات عمة ابن خالتها اللي هو راضع علي اخوها " سالتها علي تمن الغويشة الدهب وهي عينيها فيها .

طيب ما انتي ممكن توفري فلوس التليفونات دي وتروحي بيها جيم مثلا ,, طبعا لو واحدة منهم سمعت اللي انا بقوله ده ممكن تأتي علي ذكر اهلي بما لا يليق ,, بس بجد والله نفكر فيها كده! فيها ايه كل يوم ساعة من وقتك تقضيها في لعب رياضة! مش عارفة تواظبي روحي جيم نسائي , بخمسة جنيه في المرة سبت واربع يعني 10 جنية في الاسبوع ,, ممكن ساعتها تقولك : " انا اجيب بالعشرة جنية اللي حدفعها في الاسبوع دي بتشينجان لابو محمد ",, طيب حضرتك هو ابو محمد لازم ياكل بتشينـ... قصدي بدنجان؟ مينفعش يقضيها بسلطة خضرة ؟؟

وممكن توفري الوقت والفلوس وتنزلي 3 ايام في الاسبوع تعملي اي حاجة ,, حتقوليلي محتاجة فلوس حقولك لا مفيهاش فلوس ,, انزلي اتمشي ساعة , ومرة كل شهر اطلبي من جوزك انك تحضري ندوة عن اي حاجة في اي حتة ,, بلااااااااااش كده , روحي احفظي قرآن ,, وبدل ما يجيبلك هدايا و الكلام ده خليه يجيبلك كتب ,, ثقفي نفسك بنفسك , مهو اصله محدش حييجي ويقولك خدي قرص البرشام ده 3 مرات لمدة اسبوع حتبقي متعلمة ومثقفة,, موضوع العلم والثقافة ده بالذات انتي اللي بإيدك تخليه يكبر معاكي ,, واهو حتنفعي نفسك وحتنفعي اوولادك وحتعلي في نظر اللي حواليكي , واولهم جوزك ,, الراجل اللي آنيكي في بيته ده !

في الآخر انا بكتب الموضوع ده عشان اقدر _ بقدر بسيط ومتواضع _ أحارب التفاهة الرهيبة اللي بشوفها في حياتي المتواضعة دي, ربنا يستر عاللي حشوفه لما اطلع للدنيا بحق وحقيقي واشتغل .

بس بجد يا جماعة , كفاية تفاهة أبوس إيديكوا , الناس بره بتتقدم كل يوم واحنا هنا لسه مستنيين الشيف شربيني يقولنا علي الغدا بتاع بكره !

My Twitter : https://twitter.com/egyKhaltabita

Follow Me :)

READMORE